25ramadan

حلقة 25: البكاء على اللبن المسكوب | د.خالد ناجي Osloop in ramadan Dr.Khaled

Posted on Posted in osloop in ramadan, Uncategorized

أهلا بيكم في الحلقة رقم ٢٥ من برنامج أسلوب في رمضان

 

وحلقة بعنوان: اللبن المسكوب

(صوت أسلوبي) يالهويييييي… مين اللي وقع كوباية اللبن دي

أنا مش قوتلكوا تاخدوا بالكوا و

إنتوا بتحطوها

-> خلاص يا سيد… هانشيلها ونكمل الحلقة

(صوت أسلوبي) بوظتوا المكتب وبosloop photo from googleوظتوا الحلقة وبوظتوا كل حاجة…. أنا قولتلكوا ١٠٠ مرة تاخدوا بالكوا

إهيئ إهيء إهيء

يا سيدي خلاص… هانشيلها قولنا… علشان نعرف نكمل الحلقة … بلاش توتر بقى… علشان نعرف نشتغل طيب

(صوت أسلوبي) أعمل أنا إيه دلوقتي

(صوت أسلوبي) حرام عليكم

(صوت أسلوبي) مفيش حاجة بتعرفوا تعملوها صح أبدا

(صوت أسلوبي) لازم أنا اللي أعم ل كل حاجة بإيدي

ماشي ياسيدي بصوتك اللي زي الضفدع ده…

كمل إنت الحلقة لواحدك بقى… وإلبس في الحيطة… طالما إنت هاتقضيها عياط على اللبن المكبوب

(صوت أسلوبي) أحسن… أنا أصلا بعمل كل حاجة لواحدي صح…

بوظتولي الدنيا

إهيء إهيء … إهييييئ

كنا بنقول إيه إحنا يا شباب طيب

آه… صح…  حلقة النهاردة بعنوان: اللبن المسكوب (بين قوصين اللبن المكبوب)

تعالوا الأول أقولكوا:

إن الإنسان الذكي, هو اللي يتعلم صفاتة وسلوكياته في الحياة بطريقتين

الطريقة الأولى: إنه يشوف صفة أو سلوك من شخص, ويحب الشخص والسلوك ده أوي… فا يقلده في السلوك ده, علشان يكون جميل ومحبوب زيه….

والطريقة التانية: إن ربنا يرزقك بواحد بيعمل صفة بتكرهك إنت فيه, وبتكره الصفة دي… والمفروض ساعتها إن إحنا نكره وننفر من الصفة دي… ومانكررهاش أبدا

هما دول الطريقتين اللي الواحد لازم يتعلم بيهم كل صفاته في الحياة

– ندور على الناس الناجحة… ونشوف بينجحوا إزاي, ونقلدهم في صفاتهم اللي بتوصل للنجاح

– ونشوف الناس المكروهة… مكروهين إزاي… و نحاول نتجنب على أد ما نقدر الصفات اللي بيعملوها… علشان مانكونش مكروهين زيهم

هانتكلم النهاردة عن صفة مكرووووووهة جدا: وحظنا الحلو… إن معظم الناس بتعملها… الصفة دي هي: البكاء على اللبن المسكوب

جايين نفهم مع بعض إيه معنى الصفة دي… وإزاي نتجنب إننا نعملها:

– من أكتر من ١٠ سنين, كنت بشتغل مهندس برمجة في شركة  برمجة جميلة جدا ولها فروع في بلاد كتيرة

و دي كانت تاني شركة كبيرة أشتغل فيها

وكان مديري في الشركة… هو صاحب الشركة… يعني هو المالك… ولما يكون المدير بقى هو صاحب الشركة في نفس الوقت… ما أقولكش… نفوذ من كل ناحية

المهم, كان عندي مشروع أسلمه في ميعاد معين, وكان في ضغط شغل كبييير جدا … وقابلتني مشاكل غير متوقعة في المشروع ده, عطلتني كتير أوي عن إني أسلم المشروع في ميعاده…

وجينا ليلة تسليم المشروع, وجالي مديري في الشغل, اللي هو صاحب الشركة علشان يتأكد إن أنا هاسلم المشروع في ميعاده… يالهويييييي

جالي المكتب وقعد جانبي وقالي… إيه أخبار تسليم المشروع بتاع بكرة, هانسلم في ميعادنا إن شاء الله, مش كده؟

– أنا كنت متأخر في الشغل ومش هاقدر أسلم المشروع قبل ٤ أيام تأخير عن الميعاد

فا إجتهدت أوي إني أقعد أحكي قصص وحكايات ورويات إن قابلتني مشاكل غير متوقعة… وبلا بلا بلا بلا

وإني غصب عني هاتأخر في تسليم المشروع ٤ أيام عن الميعاد المحدد

وإن ده مش ذنبي

ده علشان كذا وكذا وكذا وكذا

– مديري ده كان راجل ذكي جدا, وفهم إني قاعد بعمل قصص وحوارات علشان أنا متأخر في التسليم

ولأنه راجل فعلا ذكي جدا وبيعرف إزاي ينجح في الحياة

لقيته بيبتسم إبتسامة بسيطة جدا … مشهور هو أوي بيها

ولقيته بيقولي: أنا مش جاي أعيط على اللبن المكبوب

عندنا دلوقتي مشكلة: ألا وهي… التأخير في تسليم المشروع

لو قعدنا نعيط من هنا لغاية الإسبوع اللي جاي, مش هانستفيد أي حاجة غير إن إحنا هانعطل نفسنا زيادة

وهانستهلك الطاقة اللي عندنا كلها في العياط والجدل والنقاش… وبدل مانسلم متأخر ٤ أيام… هانسلم متأخر أسبوعين

إحنا ناس أذكياء, مش هانعيط على اللي فات, هانبدأ من دلوقتي حالا, نشوف إيه اللي متأخر في المشروع

ونشوف إيه اللي نقدر نساعد بيه بعض علشان نسلم المشروع في أسرع وقت… ويكون التأخير في التسليم أقل ما يمكن… ونكون إيجابيين وأذكياء طول الوقت

– وياسيدي, بعد لما نسلم المشروع إن شاء الله, نبقى نقعد ندردش مع بعض, ونشوف إيه الأسباب اللي أدت للتأخير علشان نبقى نتجنبها في المستقبل إن شاء الله… بس هانتناقش علشان نتجنب المشاكل دي بس في المستقبل, مش علشان نرمي اللوم على بعض, أو علشان نعيط على اللبن المكبوب

أنا بجد, جاتلي صدمة… مش ده اللي أنا كنت متوقعه أبدا

أنا كنت متوقع إنه يقعد يزعق ويصرخ, ويقولي إنت مش بتحافظ على شغلك

ومش بتسلم مشاريعك في مواعيدها

وبتخسر الشركة فلوس كتيرة (وفعلا… التأخير في تسليم أي مشروع ولو يوم واحد بيخسر الشركة فلوس كتيرة جدا)

وكنت متوقع إني يتعمل عليا حفلة تأديب وإصلاح وتهذيب

على الأقل… ده اللي أنا كنت بشوفه بيحصل في باقي الشركات… وحتى في البيوت

لما يحصل مشكلة… بدل لما نحط مجهودنا في التفكير في حل المشكلة

بنقعد نعيط ونزعق ونبهدل في بعض… وكل واحد يشاور على التاني علشان يقول: هو السبب

لكن مش هو ده اللي حصل أبدا… مديري في الشغل كان إنسان ذكي جدا وبيعرف إزاي ينجح في الحياة

وعمري ما شوفته في ال ٥ سنين اللي إشتغلتهم معاه, بيبكي أبدا على اللبن المكبوب

طبعا أنا كان نفسي أقولكم إن مديري في الشغل ده إسمه د. خالد مجدي ناجي, وإنه بيشتغل دكتور في كلية هندسة وكده يعني

لكن للأسف, مش هاينفع أقولكوا… علشان الدعايا… إنتوا عارفين

لكن… إن شاء الله هايكون عندنا حلقات كتيرة جدا, أحكيلكوا فيها عن صفات الذكاء والنجاح العملي اللي إتعلمتها عمليا من د. خالد… بس… مش هاينفع أقول على إسمه… إنتوا أكيد عارفين يعني

هات بقى كراستك الجميلة بتاعة أسلوب في رمضان… وإكتب النقط المهمة جدا جدا جدا دي

– الناس اللي بتبكي على اللبن المكبوب دايما… بتكون ناس مكروهة… ومش ناجحة… إوعى تقلدها

– لو ربنا رزقك بشخص, بيضيع وقت ومجهود دايما إنه يبكي على اللبن المكبوب في كل حاجة, فا دي هدية من ربنا علشان

تتعلم إنك ماتعملش زيه

– لما خدم سيدنا أنس ابن مالك سيدنا رسول الله صل الله عليه وسلم عشر سنين

و أراد أن يصل النبي صل الله عليه وسالم… الوصف اللي قاله هو:

أنس بن مالك قال خدمت رسول الله صلى الله عليه وسلم عشر سنين

والله ما قال لي أفا قط ولا قال لي لشيء لم فعلت كذا وهلا فعلت كذا

سيدنا أنس كان ذكي جدا, فهم أد إيه إن دي من أجمل الصفات اللي ممكن تكون مبهرة في إنسان,

وهو ده وصف الرسول صل الله عليه وسلم

مكانش أبدا بيبكي على اللبن المكبوب … كان صل الله عليه وسلم صاحب طريق نجاح

نقطة مهمة جدا جدا جدا, لكل الأباء والأمهات والمديرين وكل شخص له سلطة

أولادكم والناس اللي بيشتغلوا تحتكوا, هايعملوا مصايب كتيييرة جدا… زي بالظبط المصايب اللي إنتوا عملتوها وإنتوا في في مكانهم…

نصيحة أخوية مننا… بلاش تمشوا دايما في الحياة بطريقة: البكاء على اللبن المكبوب

أولا: دي طريقة مضمونة للفشل

ثانيا: دي طريقة بتكره الناس فيكم

واجب الحلقة النهاردة

إكتبلنا في كومنت: إيه الصفة الكويسة اللي إنت لقيتها في شخص, وناوي إنك تقلده في الصفة الكويسة دي

وإيه الصفة اللي مش كويسة اللي لقيتها في شخص, وناوي إنك تتجنب إنك تعملها طول عمرك

وأكيد, إعمل شير للحلقة ومنشن لكل واحد إتعلمت منه صفة واحدة كويسة

وشجعنا بعمل لايك للحلقة… وهاروح أنا بقى أتاخنق مع باقي فريق العمل

أشوف مين فيهم اللي كب اللبن أول الحلقة

ورمضاااااااان كريييييم

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على #‏موبايلك #‏الأندرويد من هنا:
http://bit.ly/osloop-android
وأسلوب #‏أيفون من هنا:
http://bit.ly/osloop-iOS-eg
وده, #‏موقع أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/
وأكيد أسلوب على تويتر:
https://twitter.com/OsloopLife

Leave a Reply

Your email address will not be published. Required fields are marked *