18

كيف تقهر الملل؟ أسلوب في دقيقة التغلب على الملل حلقة رقم18

Posted on Posted in osloop in a min

كيف تقهر الملل؟

أهلا بيكم في الحلقة رقم ١٨ من برنامج أسلوب في دقيقة

اللي بنجاوب فيها على الأسئلة اللي بتوصلنا في كومنتس, بس مانوعدكوش إنها هاتكون دقيقة بالظبط

لأنها عمرها ما بتكون دقيقة أبدا

السؤال اللي بيوصلنا دايما

كيف تقهر الملل؟؟

أنا بحس بملل رهيب وأنا بذاكر

وأنا بحس ب ملل في حياتي العملية

أنا بحس بملل في حياتي الزوجية

أعمل إيه؟؟؟

ياريت لو كان الملل ده كائن, يقدر الواحد يخبطه خبطتين على دماغه كده, علشان يتعدل ويتحول لتسلية

عندنا خطوات هاتساعدنا إننا نتغلب على الملل وكمان نرحب بيه لما يدخل حياتنا ونقوله أهلا وسهلا… إنت جيييييت يا رمضااااان

أول خطوة:

أول لما تبدأ يومك الصبح, تكتب خطتك اليومية, اللي متفقين مع بعض عليها من زماااان في أسلوب

وأول حاجة تفكر تكتبها في خطتك اليومية, إنك تكتب حاجة هاتعملها في اليوم هاتبسطك أو تسليك

وهايكون لها أثر شعور جميل عليك

تعالى بقى لما نذل فيك شوية:

إحنا في أسلوب شجعناك أكتر من مرة, إنك تكتب خطة مهامك اليومية كل يوم الصبح

علشان اليوم مايعديش عشوائي كده, وتحس بإنك عملت حاجات مفيدة

ومعظم الناس بتفتكر إن الخطة دي لازم تكون مليان بأعمال ومهام فقط

لكن إحنا بنشجعك في أسلوب إنك كمان تكتب حاجة تعملها في اليوم تخليك مبسوط

حاجة مسلية تكسر بيها اليوم, وتشحنك سعادة علشان تقدر تكمل وتكسر الملل.

في ناس بتحب تتمشى…

وناس تانية بتحب تشرب قهوة مظبوطة مع كتاب جميل

وفي ناس بتتابع مسلسل شيق وممتع…. بس مسلسل واحد بس… مش عشرين مسلسل… إعتبر الألف إعلان اللي في النص كفاية أوي

كل واحد يكتب اللي هو عايزه, المهم يعيش حيااااااه

لو إنت بتذاكر وعندك جدول ماشي عليه, لازم تحط في الجدول ده وقت للتسلية والمتعة برضه علشان تشحن وتقدر تكمل

تاني خطوة: التغيير

قرر كل يوم إنك تعمل حاجة جديدة وتغير شيء في حياتك

النهاردة بس…

مثلا, لو بتذاكر … غير مكان مذاكرتك

أو هات حد من أصحابك يذاكر معاك على سبيل التغيير

أو حتى غير لون ونوع الورق اللي بتذاكر فيه

والأقلام والأدوات اللي بتستخدمها

و غير و جرب طرق جديدة للمذاكرة… وإتكلمنا على بعض الطرق دي في الحلقة رقم ٧ من برنامج أستوديو أسلوب بعنوان: مذاكرات طالبة مثالية

هاتفيدك أوي برضه, وتعلمك طرق جديدة للمذاكرة … ممكن تكون لسه ماجربتهاش

في حياتك الزوجية, التغيير مهم جدا

– كل يوم قرر إن النهاردة بس, هاتغير طريقة حوارك مع زوجتك للأحسن

غير الطريقة اللي بتطلب بيها أي حاجة منها

– قرر إن النهاردة بس هاتقولها كلمة طيبة, تخلي يومها ويومك حلو

– قرر إن النهاردة بس تغير الروتين, وتتجنب خناقة كل يوم… أو حتى تتخانق خناقة جديدة… مش كل يوم خناقة فردة الشراب الضايعة على الصبح

قرري إنتي كمان كل يوم الصبح إن النهاردة بس هاتغيري وتعملي أكلة جديدة… أظن اليوتيوب مليان خطوات من بتاعة: يا جمالواا يا جمالوووا

وغيري من ديكور البيت… حتى لو حطيتي برواز جديد, أو اشتريتي طقم أطباق جديد

أو تغيري أماكن العفش…

التغيير في البيت بيخلق جو من البهجة على الأسرة كلها

الخطوة التالتة: الحضور

هاتقولي إيه معنى الحضور… حضور وغياب… ولا إيه الحكاية؟؟؟

لأه… حضور يعني تواجدك… To be present

تكون حاضر, بذهنك, وطاقتك بأي شيء بتقوم بيه

خليك حاضر وإنت بتذاكر… ذهنك وطاقتك كلهم حاضرين

وقت المذاكرة يعني مذاكرة, مفيش هزار

تكون حاضر بكل طاقة وتركيز وإنت بتذاكر

خليك حاضر وإنت خارج بتتفسح مع عيلتك أو أصحابك

وقول: هاستمتع بوقتي يعني هاستمتع بوقتي من غير كلام

ولو مش مبسوط… هاعمل نفسي مبسوط بالعافية وأعيش اللحظة

خليك حاضر وقت اللعب مع أولادك… لازم نعيش كل لحظة من حياتنا وإحنا حاضرين فيها… لأن الحياة عبارة عن لحظات بنعيشها

….

لازم تاخد موضوع السعادة والحضور في حياتك ده, بجدية كاملة… السعادة في الحياة إختيارك إنت

كمان إتفرج على الحلقة رقم ٣ من برنامج: أستوديو أسلوب, واللي إتكلمنا فيها بالتفصيل على طرق للقضاء على يوم صعب… وبااااين من أوله

مكانك… إضغط لايك… وشير للحلقة دي… وإعمل منشن لكل الناس اللي يهمك نجاحهم… الدور دلوقتي عليك إنت في توصيل رسالة أسلوب… ماتخليش حلقات أسلوب تقف عندك

وإكتبلنا أسئلتك لحلقاتنا اللي جاية… وشاركنا في كومنت, بتعمل إيه علشان… تقهر الملل

Leave a Reply

Your email address will not be published. Required fields are marked *